ХАТАНБУЛАГ СУМЫН ЗАСАГ ДАРГЫН ТАМГЫН ГАЗРЫН ТАНИЛЦУУЛГА
БАЙГУУЛЛАГЫН ТҮҮХЭЭС
Тус сумын эдүгээ оршин буй нутаг нь 11-12 дугаар зууны үеийн Хэрэйд аймаг, Манжийн ноёрхлын үеийн Түшээт хан аймгийн Говь мэргэн вангийн хошуу, 1923 оноос Хутаг уулын хошуу, 1931 оноос Дорноговь аймгийн нутагт хамаарах болсон бөгөөд 1924 оны 06 дугаар сарын 25-ны өдөр Мэргэн вангийн баруун долоогийн Ардын Төлөөлөгчдийн хурлаас Хутаг уулын хошууг эмхлэн байгуулсаны голомт түшин үлдэж Амна уснаа төвлөрсөн тул Хатанбулаг сумыг 1924 онд байгуулагдсан гэж үздэг.
1931 онд Хутаг уулын хошуу нь Хатанбулаг, Агаруут, Хөвсгөл, Улаанбадрах, Наранбулаг сумд болсон байна.Хошууны Тамгын газрын бүрэлдэхүүнд 4 хэлтэс байсан бөгөөд хошуу захиргаанд эрхэлсэн түшмэл 1, туслах түшмэл 2, зарлага 1, жинхэнэ бичээч 2, сурах бичээч 2, орлого, зарлага байцаах комисст 3 хүн сонгосон байна. Энэ үед хошуу нь 585 өрх, 59 аравт, 12 баг, 4 сумтай байжээ.Хатанбулаг сумын анхны дарга нь Дэмидийн Жанцан байсан.
1992 он хүртэл Ардын Депутатуудын Хурлын гүйцэтгэх захиргаа нэрээр явж ирсэн бөгөөд шинэ үндсэн хууль батлагдсанаар Ардын депутатуудын хурлын гүйцэтгэх захиргаа татан буугдаж, Монгол улсын Засаг захиргаа нутаг дэвсгэрийн нэгж, түүний удирдлагын тухай хуулиар Засаг даргын Тамгын газар болж өөрчлөгдсөн.Сумын Засаг даргаар О.Батмөнх, Ш.Тэрбиш, Г.Намсрайжав, М.Дөш, Т.Банди, Ш.Батмөнх, В.Болдмаа, С.Баттогоо, М.Мөнхбаяр нар ажиллаж байсан бөгөөд 2016 оны 09 сарын 16-ны өдрөөс одоог хүртэл С.Эрдэнэболд сонгогдон ажиллаж байна.
Засаг даргын орлогчоор Ж.Төмөрмөнх, Ж.Эрдэнэхүү, Д.Батцэцэг, Д.Банзрагч, Л.Оюунхишиг, Т.Цэцэгсүрэн, С.Эрдэнэболд, З.Чимэдцэрэн, 2016 оны 11 сараас Г.Ганмөнх одоог хүртэл ажиллаж байна.
Засаг даргын Тамгын газрын даргаар Т.Банди, С.Үл-Олдох, Л.Оюунхишиг, Д.Оюунбаатар, Б.Навчаа, Ш.Тэрбиш нар ажиллаж байсан бөгөөд 2013 оны 12 сарын 09-ний өдрөөс одоог хүртэл Т.Цэцэгсүрэн ажиллаж байна.
Хатанбулаг сумын Засаг даргын Тамгын газар нь Санхүүгийн алба, Хөдөө аж ахуйн тасаг, Ханги суурьшлийн бүсийн тасаг, гэсэн 3 нэгжтэй, Багийн Засаг даргын ажлын алба 6, ХАА-н тасаг 2, Санхүүгийн алба 4, босоо удирдлагатай 6, ЗДТГ-ын үндсэн бүтэц 12, Ханги суурьшлийн бүсийн тасаг 2, гэрээт ажилтан 2 нийт 34 албан хаагчтай үйл ажиллагаа явуулж байна.
Аймгийн Засаг даргын 2016 оны А/617 дугаар захирамжаар Ханги суурьшлийн бүсийн тасгийг 4 орон тоотой байгуулсан бөгөөд 2019 оноос эхлэн 3 орон тоотой ажиллаж байна. Ханги суурьшлийн бүсийн тасгийн даргаар Ж.Ундармаа, Б.Билэгбаяр, Э.Чинбат нар ажилласан.
Төрийн албаны ангиллаар авч үзвэл төрийн улс төрийн 8, төрийн захиргааны 15, төрийн үйлчилгээний 13 албан хаагч байна. Албан хаагчдыг боловсролын түвшингээр нь авч үзвэл: Дээд боловсролтой 20, бүрэн дунд боловсролтой 11 , суурь боловсролтой 3 байна.
Засаг даргын ажлын алба нь Тамгын газар бөгөөд дараах чиг үүргийг хэрэгжүүлнэ.Үүнд:
1.Нутаг дэвсгэрийн эдийн засаг, нийгмийн хөгжлийн стратегийн төлөвлөлт, хөтөлбөр, төсөл зохиох, зохицуулах, хяналт шинжилгээ хийх, үнэлж дүгнэх, бодлогын удирдамжаар хангах;
2.Засаг даргаас бүрэн эрхээ хэрэгжүүлэхэд нь зохион байгуулалт, эрх зүй, аж ахуйн талаар болон Тамгын газрын хэлтэс, албадын үйл ажиллагааг уялдуулан зохицуулах, нутгийн захиргааны байгууллагыг чиглүүлэн удирдахад нь Засаг даргад туслах;
3.Хурал, Засаг дарга, доод шатны нутгийн захиргааны байгууллагыг шаардлагатай мэдээллээр хангах;
4.Хууль тогтоомж, Засгийн газар, Хурал, Засаг даргын шийдвэрийг биелүүлэх үүрэг бүхий байгууллага, албан тушаалтанд хүргүүлэх, хэрэгжилтийг зохион байгуулах, гүйцэтгэлд нь хяналт тавьж үр дүнг тооцох;
5.Тамгын газрын бичиг хэргийг хөтлөх, байгууллага, иргэдээс ирүүлсэн өргөдөл, санал, гомдлыг шийдвэрлэх ажлыг зохион байгуулах;
6.Төрийн захиргааны ажилтныг бэлтгэх, давтан сургах, мэргэшүүлэх, тэдний ажиллах нөхцөл, нийгмийн баталгааг хангах ажлыг хууль тогтоомжийн хүрээнд зохион байгуулах;
7.Тухайн шатны Хурлын хэвийн үйл ажиллагааг хангаж аж ахуйн талаар үйлчлэх.
Үндсэн чиг үүргийн хүрээнд дараах арга хэмжээг хэрэгжүүлэн ажилласан.Үүнд:
2015 онд сумын Засаг даргын захирамжаар “Иргэдээ сонсъё” уулзалт өдөрлөгийг улирал тутам зохион байгуулахаар шийдвэрлэж, “Эрх зүйн мэдлэгийг иргэн бүрт” уриалгыг дэвшүүлэн ажилласан. 2016-2020 онд “Иргэдээ сонсъё” уулзалт өдөрлөгийг 14 удаа зохион байгуулж, 28 хуулиар мэдээлэл бэлтгэн 6520 хүнд хүргэсэн. 2015-2020 онд Төрийн албан хаагчдад зориулсан сургалтыг 40 хуулиар зохион байгуулж, давхардсан тоогоор 1524 албан хаагчийг хамруулсан.
2017 оноос “Хатанбулагийн мэдээлэл” сэтгүүлийг гаргаж эхэлсэн бөгөөд 16 нүүрээр 9 дугаарыг бэлтгэж, 6300 өрхөд хүргэсэн.
Төрийн байгууллага, албан хаагчдын үйл ажиллагаанд иргэдээр үнэлгээ өгүүлэх ажлыг 2018-2020 онд 3 удаа хийж, 652 хүнийг хамруулан зохион байгуулсан.Судалгаанд насанд хүрсэн хүн амын 34,5 хувийг хамруулсан.
2021 онд Хатанбулаг.мн вэб сайтыг 6,000,000 сая төгрөгөөр хийлгэж, төрийн байгууллагуудын үйл ажиллагааны мэдээ, мэдээллийг оруулж эхэлсэн. Мөн Төрийн мэдээллийн нэгдсэн системээс 74 байгууллагын 11 төрлийн лавлагааг хурууны хээгээр иргэдэд олгож эхэлсэн.
2022 оноос Төрийн байгууллагуудын дотоод үйл ажиллагааны нэгдсэн систем (erp-mongolia)-д холбогдож гаднаас бичиг хүлээн авах, гадагшаа бичиг явуулах үйл ажиллагааг цахимжуулж, албан хаагчдын цагийг цахимаар бүртгэж эхэлсэн. 2024 он гэхэд иргэдэд үзүүлэх төрийн үйлчилгээний 80 хувийг цахимжуулсан.
Албан хаагчдын ажиллах нөхцлийг сайжруулах чиглэлээр:
ОНХС-ийн 40,0 сая төгрөгийн хөрөнгө оруулалтаар ЗДТГ, иргэний танхимын их засварын ажлыг хийж гүйцэтгэсэн. 2017-2019 онд батлагдсан төсвийн хүрээнд 15 компьютер, принтер, 17 ширээ, 13 сандал худалдан авч, бүх албан хаагчдын техник хэрэгсэл, тавилга эд хогшлыг шинэчлэх ажлыг хийсэн. 2021 оноос дулаан, цэвэр бохирын нэгдсэн шугамд холбогдсон.
Нийгмийн баталгааг хангах чиглэлээр:
2014-2024 онд давхардсан тоогоор 12 албан хаагчид шинээр зэрэг дэв олгуулах болон үйл ажиллагааны үр дүнг үндэслэн ахиулсан. 16 албан хаагчийн цалингийн шатлалыг ажилласан жил, үйл ажиллагааны үр дүнгийн үнэлгээг үндэслэн ахиулсан бөгөөд 2019 оноос хоолны хөнгөлөлт өдрийн 3,000, 2023 оноос 10,000 төгрөгөөр олгосон. 2023 оны 01 сарын 01-ний өдрөөс эхлэн хөдөө орон нутагт ажилласны нэмэгдлийг төрийн захиргааны болон үйлчилгээний албан хаагчдад олгож эхэлсэн. Мөн төрийн захиргааны албан тушаалд 5-аас дээш жил тогтвор суурьшилтай ажилласан 5 албан хаагчийг 6 сарын цалинтай тэнцэх 1 удаагийн тэтгэмж, урамшуулалд хамруулсан. 2023 оны байдлаар 8 албан хаагчийг түрээсийн орон сууцаар хангасан. ОНХС-ийн хөрөнгөөр байгуулсан “Жишиг хашаа” төслийн хүрээнд цаашид тогтвор суурьшилтай ажиллах 3 албан хаагчид 0,7 га эзэмшлийн газартай хашааг үнэ төлбөргүй олгосон.
Амжилт бүтээл:
Засаг даргын Тамгын газрын хамт олон нь 2015 онд сумын “Тэргүүний хамт олон”, 2017 онд “Авьяаслаг хамт олон”, 2018 онд “Ахмадад ээлтэй байгууллага”, 2019 онд “Аймгийн тэргүүний хамт олон” өргөмжлөлөөр шагнагдсан. Хамт олны дундаас 2018 оны “Аймгийн тэргүүний ажилтан” тодорсон.
Хатанбулаг сум нь 2017, 2018, 2020 оны захиргааны байгууллагын хяналт шинжилгээ үнэлгээний үр дүнгээр Аймгийн “Шилдэг сум” өргөмжлөл, 2022 онд Монгол Улсын Төвийн бүсийн “Шилдэг сум”, 2023 онд Аймгийн “Шилдэг сум”-аар тус тус шалгарсан.
2024 оны 06 сарын 01-ний байдлаар ажиллаж байгаа албан хаагчид
Сумын Засаг дарга Сайнбуян Эрдэнэболд
Сумын Засаг даргын орлогч Галбадрах Ганмөнх
Засаг даргын Тамгын газрын дарга Тангаа Цэцэгсүрэн
Хууль эрх зүйн мэргэжилтэн Дүүдүү Буянцэцэг
Нийгмийн бодлогын мэргэжилтэн Батцэцэг Дэлгэрцэцэг
Иргэд олон нийттэй харилцах ажилтан Бямбасүрэн Алтаншагай
Жолооч Өргөнцагаан Пүрэвсүрэн
Жолооч Үйзэнтогоо Дашсодном
Жижүүр Данзан Шүхэрт
Жижүүр Мөнхбаатар Болд-Эрдэнэ
Багийн Засаг даргын ажлын алба
1 дүгээр багийн Засаг дарга Намсрай Өлзийдэмбэрэл
2 дугаар багийн Засаг дарга Баяраа Эрдэнэбаяр
3 дугаар багийн Засаг дарга Хад Мөнхтуяа
4 дүгээр багийн Засаг дарга Буньмаа Оргодол
5 дугаар багийн Засаг дарга Чулуунбат Саранзаяа
6 дугаар багийн Засаг дарга Өсөнбадрах Мөнгөнхөлөг
Санхүүгийн алба
Санхүүгийн албаны дарга Түвшинбаяр Ууган-Эрдэнэ
Төсөв, төрийн сангийн мэргэжилтэн Очирсүрэн Содцэцэг
Нягтлан бодогч Эрдэнэ-Очир Даваасүрэн
Нярав Нармандах Золжаргал
Хөдөө аж ахуйн тасаг
Бэлчээр тэжээл, газар тариалангийн асуудал хариуцсан мэргэжилтэн Сод-Эрдэнэ Азжаргал
Хүнс, ЖДҮ, хоршооны асуудал хариуцсан мэргэжилтэн Жаргалсайхан Шинэтуяа
Ханги суурьшлийн бүсийн тасаг
Тасгийн дарга Эрдэнэжаргал Чинбат
Татвар хураагч Баасанхүү Норзой
Гэрээт ажилтан
Хог хаягдал устгах цэвэрлэх ажилтан Өргөнцагаан Пүрэвдорж
Тулгатогоо Энхцэцэг
